INFORMACIÓN
Ruta do apego
A Ruta do Apego de Rianxo é unha actividade do Proxecto Apego.
APEGO é un programa colectivo creado para fomentar e mellorar a transmisión do galego como lingua inicial.
Naceu por iniciativa da Coordinadora de Traballadores/as de Normalización Lingüística e desenvólvese, de xeito cooperativo, entre os servizos de normalización dos concellos adheridos. As actividades incluídas neste programa van dirixidas ás crianzas de 0 a 6 anos e ás persoas que as acompañen.
Atoparedes moita máis información do Proxecto Apego na súa páxina web. Nesta páxina poderedes saber se os vosos concellos están adheridos ao proxecto, coñecer as actividades para crianzas que desenvolven e tamén atoparedes a forma de inscribirse nel.
Recomendacións para a ruta
- Para seguir esta ruta da mellor maneira posible, primeiro recomendámosche ter o caderno. Tamén é moi útil ter un móbil ben cargado, para poder ir consultando os códigos QR coa información adicional da ruta.
- Lembra traer auga fresca e mantervos ben hidratados/as, teredes lugares onde descansar, merendar e ata, se vai moita calor e sodes moooi valentes, de bañarvos!
- É moi importante para camiñar levar un calzado adecuado e roupa ben cómoda e se vindes con peques moi peques, podedes facer porteo. A ruta é boa de camiñar pero non sempre vai ser doado transportar por ela algo con rodas. Hai algún paso estreito e desniveis no camiño de pedra e terra, polo que non é doado transportar un carriño ou cadeira de rodas por todos os tramos.
- Non hai costas pronunciadas, pero si unhas escaleiriñas na ponte. O terreo non é sempre uniforme, hai pedras e raíces por ser un contorno natural e hai unha ponte estreita ao carón do muíño de Francuín. Ide con tino e de vagar, só son 5 pasos, mais nos que hai que ir con maiores e con moito ollo!
- Lixo: non tiredes o lixo na ruta, levade unha bolsa para gardar o refugallo, ao final do camiño atoparedes onde tiralo.
- Barullo: lembrade que no bosque viven moitos animais; por aquí están afeitos a escoitar xente, así que non pasa nada por facer algo de barullo, pero se facedes pouco ruído, igual podedes ver paxariños, ou algún outro animal salvaxe.
- Atención ás condicións meteorolóxicas: no verán andade con moito tento co sol e coa calor. Evita facer a ruta con moita choiva. Sobre todo no outono e no inverno, pode que algunha parte do camiño estea anegada de auga pola subida do río.
“Con choiva e con vento, nin monte, nin río, que perdes o tempo!”
